Eyrún Eyþórsdóttir er sjötti fyrirlesari fyrirlestraraðarinnar Hinsegin Ísland í alþjóðlegu samhengi sem er haldin í samstarfi RIKK – Rannsóknastofnunar í jafnréttisfræðum og Jafnréttisskólans (GRÓ-GEST) á vormisseri 2022. Fyrirlestur Eyrúnar nefnist „Hatur gegn hinsegin“ og verður haldinn kl. 12.00 þann 7. apríl í fyrirlestrasal Þjóðminjasafns Íslands og sýndur í streymi.

Kynhneigð og kynvitund eru meðal þess sem almenn hegningarlög vernda sérstaklega hérlendis. Verndin er til staðar vegna þess að viðurkennt er að hinsegin fólk, auk annarra minnihlutahópa, eru í meiri hættu að verða fyrir hatursglæpum en aðrir. Það er að segja að hatursglæpum er beitt nánast eingöngu gagnvart fólki með minnihlutabakgrunn. Kanadíska fræðakonan Barbara Perry hefur lagt áherslu á að fjalla um hatursglæpi sem leið ákveðinna hópa í samfélaginu til að jaðarsetja og útiloka aðra hópa, og með þeim hætti viðhalda valdi sínu og beita sér gegn réttindabaráttu minnihlutahópa. Sé miðað við aðrar þjóðir eru réttindi hinsegin fólk hérlendis mikil og almennt er staða þeirra góð. Þrátt fyrir það birtast reglulega í fjölmiðlum frásagnir hinsegin fólks um hatursglæpi gegn sér. Lítið er þó vitað um hatursglæpi gegn hinsegin fólki hérlendis og því er tíðni slíkra glæpa óþekkt. Fyrirlesturinn byggir á yfirstandandi rannsókn um hatursglæpi á Íslandi. Markmið rannsóknarinnar er að varpa ljósi á hatursglæpi í íslensku samfélagi, hverjar birtingarmyndir þeirra eru, hverjir verða helst fyrir slíkum brotum og hverjar helstu afleiðingar þeirra eru. Í fyrirlestrinum hefur Eyrún dregið úr gögnum rannsóknar um upplifun hinsegin fólks af hatursglæpum, þar með talin haturstjáning og mismunun vegna kynhneigðar og -vitundar. 

Eyrún er með doktorspróf í mannfræði frá Háskóla Íslands og starfar sem lektor í lögreglufræði við Háskólann á Akureyri.  

Frekari upplýsingar um fyrirlestraröðina má finna á heimasíðu RIKK – rikk.hi.is – og Facebook-síðu stofnunarinnar auk þess sem hægt er að skrá sig á tölvupóstlista RIKK hér. Upptaka af fyrirlestrinum verður gerð aðgengileg á Youtube-rás Hugvísindasviðs.