Farsæl öldrun, hver er galdurinn?

Ingrid Kuhlman

Ingrid Kuhlman er fyrsti fyrirlesari fyrirlestraraðar RIKK á haustmisseri 2019 og nefnist fyrirlestur hennar „Farsæl öldrun, hver er galdurinn?“ Fyrirlesturinn er fluttur fimmtudaginn 5. september, kl. 12:00-13:00 í fyrirlestrasal Þjóðminjasafns Íslands.

Í erindinu byggir Ingrid á lokaverkefni sínu í hagnýtri jákvæðri sálfræði frá Buckinghamshire New University. Verkefnið var eigindleg rannsókn á skynjun og skilningi eldri borgara á vellíðan. Þátttakendur voru sjö konur á aldrinum 70-79 ára. Í rannsókninni komu í ljós sjö þemu sem sýna hvernig þátttakendur hafa skapað sér hamingjuríka tilveru og mun Ingrid fjalla um þessar niðurstöður í erindinu. Þær gefa okkur innsýn í það hvernig eigi að lifa hamingjuríku og ánægjulegu lífi og hvað eldri borgarar gera dags daglega til að auka vellíðan sína.

Read more »

#MeToo: moving forward

Í september verður haldin alþjóðleg ráðstefna í tilefni þess að tvö ár eru liðin frá því að #MeToo-bylgjan hófst. Ráðstefnan er liður í formennsku Íslands í Norrænu ráðherranefndinni og er skipulögð í samstarfi við RIKK.

Frá því að #MeToo-bylgjan hófst haustið 2017 hafa tugir milljónir kvenna notað myllumerkið #MeToo á samfélagsmiðlum um allan heim. Ýmist undir nafni eða nafnleynd, hafa konur víðsvegar um heim afhjúpað umfangsmikið kynferðislegt og kynbundið ofbeldi og áreitni. Konur hafa krafist aðgerða til að bregðast við og binda endi á kynbundið ofbeldi og mismunun gagnvart konum. Bylgjan hefur haft mismunandi áhrif í ólíkum löndum; sum virðast ósnert á meðan frásagnir kvenna hafa leitt til róttækrar endurskoðunar í öðrum löndum. Á Norðurlöndunum, sem almennt eru talin standa hvað best af vígi í jafnréttismálum, hefur umfang og áhrif #MeToo verið mismunandi.

Read more »

Alþjóðleg ráðstefna í kynja- og jafnréttisfræðum við HÍ

Alþjóðleg ráðstefna norræna samstarfsnetsins NORA í kynja- og jafnréttisfræðum verður haldin dagana 22.–24. maí 2019 við Háskóla Íslands. Ráðstefnan ber yfirskriftina „Border Regimes, Territorial Discourses and Feminist Politics“ og er haldin á vegum RIKK – Rannsóknastofnunar í jafnréttisfræðum í samstarfi við Alþjóðlegan Jafnréttisskóla (UNU-GEST) og ransóknasetrið EDDU við Háskóla Íslands.

Á ráðstefnunni verða fluttir tæplega 250 fyrirlestrar og fimm lykilfyrirlestrar um álitamál sem varða m.a. landamæri og jafnréttismál á tímum vaxandi þjóðernishyggju, afnýlendustefnu, femínískt andóf, popúlisma, hinsegin fræði, frumbyggjafræði, og fólksflutninga.

Read more »

Að erfa minningar: Áföll og æviskrif

Gunnþórunn Guðmundsdóttir, prófessor

Gunnþórunn Guðmundsdóttir, prófessor í almennri bókmenntafræði við Háskóla Íslands, er áttundi og síðasti fyrirlesari í fyrirlestraröð RIKK – Rannsóknastofnunar í jafnréttisfræðum – og UNU-GEST – Jafnréttisskóla Háskóla Sameinuðu þjóðanna – á vormisseri 2019. Fyrirlestur hennar nefnist: „Að erfa minningar: Áföll og æviskrif“ og er fyrirlesturinn fluttur í fyrirlestrasal Þjóðminjasafns Íslands, fimmtudaginn 2. maí kl. 12:00-13:00.

Í fyrirlestrinum fjallar Gunnþórunn um sjálfsævisögulega texta þar sem höfundarnir reyna að átta sig á hinu liðna, skýra minningar sínar og fjölskylduminnið í ljósi trámatískra atburða úr fortíð. Rætt verður um hugtakið ‚post-memory‘ og hvernig það hefur verið nýtt til að greina ýmiss konar texta um áföll fyrri kynslóða. Vitneskja afkomendanna getur verið mjög takmörkuð og einungis byggð á hálfsögðum sögum og ófullkomnum heimildum. Kannað verður hvernig og hvort mögulegt sé að halda slíkri fortíð til haga og koma henni til skila í frásögn.

Read more »

Áföll, geðheilsa og félagslegt samhengi

Bryndís B. Ásgeirsdóttir, dósent, og Rannveig S. Sigurvinsdóttir, lektor

Bryndís Björk Ásgeirsdóttir, dósent, og Rannveig Sigurvinsdóttir, lektor, flytja sjöunda fyrirlesturinn í fyrirlestraröð RIKK – Rannsóknastofnunar í jafnréttisfræðum – og UNU-GEST – Jafnréttisskóla Háskóla Sameinuðu þjóðanna – á vormisseri 2019. Fyrirlestur þeirra nefnist: „Áföll, geðheilsa og félagslegt samhengi“ og er fyrirlesturinn fluttur í fyrirlestrasal Þjóðminjasafns Íslands, fimmtudaginn 4. apríl kl. 12:00-13:00.

Í fyrirlestrinum verður fjallað um tengsl áfalla við geðheilsu og líðan, auk kynjamunar í þessu samhengi. Þá verður sérstaklega rætt um áhrif ýmissa þátta í nærumhverfi og samfélaginu á einstaklinginn og hvernig þeir tengjast aukinni hættu á áföllum og tengslum þeirra við geðheilsu. Að lokum verður rannsóknin Geðheilsa karla og kvenna á Íslandi kynnt en hún er stórt rannsóknarverkefni við sálfræðideild Háskólans í Reykjavík.

Hér má nálgast glærur fyrirlestrarins. 

Read more »

„Það var barn í dalnum …“ Um hrjáð börn og fleira í verkum Steinunnar Sigurðardóttur

Dagný Kristjánsdóttir, prófessor

Dagný Kristjánsdóttir, prófessor í íslenskum nútímabókmenntum, er sjötti fyrirlesari í fyrirlestraröð RIKK – Rannsóknastofnunar í jafnréttisfræðum – og UNU-GEST – Jafnréttisskóla Háskóla Sameinuðu þjóðanna – á vormisseri 2019. Fyrirlestur hennar nefnist: „„Það var barn í dalnum …“. Um hrjáð börn og fleira í verkum Steinunnar Sigurðardóttur“ og að venju er fyrirlesturinn fluttur í fyrirlestrasal Þjóðminjasafns Íslands, fimmtudaginn 21. mars kl. 12:00-13:00.
Mjög margar af bókum Steinunnar Sigurðardóttur fjalla um dramatísk tilfinningasambönd, vináttu, stuðning og samstöðu. Eða þrá einmana fólks eftir slíkum tengslum sem geta ekki orðið. Það reynist einhver „ómögulegleiki“ í stöðunni. Oft eru fortíðardraugar á ferð. Það eru börn á sveimi; draugabörn, villibörn og börn sem hafa verið beitt ofbeldi eða verið vanrækt. Þau hafa iðulega verið svikin af fólki sem áttu að vernda þau. Hvernig er hægt að segja sögurnar af þeim og þarf að gera það?.
Dagný er prófessor í íslenskum samtímabókmenntum í Íslensku og menningardeild. Sérsvið hennar er íslensk bókmenntasaga, kvennabókmenntir, barnabókmenntir, kynjafræði, sálgreining og læknahugvísindi.

Read more »